• إشمعنى فلامنك يعني ؟

– بحبها انا بحب الجبنه الفلامنك

• وعرفت منين انك بتحبها ؟ .. أكلت الجبنة البيمستر الهولندي ولا الامنتال ؟

– ﻷ

• يبقى انت مابتحبش الفلامنك .. إنت متخيل إنك بتحبها عشان ماجربتش الأحلى منها

– مش فاهم

• افهمك .. إنت مثلا متخيل إنك راجل محترم .. بس إنت مش محترم ولا حاجة .. كل الموضوع إنك ماتحطيتش تحت الضغط اللي يطلع النقص اللي جواك .. زي الفرق ما بين الحرامي والشريف .. الحرامي احتاج فلوس فسرق والشريف معاه فلوس فلسه ماسرقش

,

– إنت عايز إيه يا عم الحاج

• عايزك تعرف إنها ماشية بالستر يابني .. إنت ذكي عشان اللي حواليك أغبى منك .. مثقف عشان اللي حواليك أجهل منك .. لكن في ظروف تانية وناس تانية كان ممكن تبقى جربوع واغبي واحد في الدنيا ..

• الدنيا مافيهاش ثوابت غير إن كلنا هانموت .. الفلامنك زي الإسطنبولي .. الطعم ده وهم .. إيحاء نفسي .. الموضوع يتوقف على قناعتك الشخصية إن اللي بتاكله ده طعمه حلو ..

طب تفسر بإيه إن فيه شعوب بتاكل ضفادع وصراصير ؟؟ .. ولو حد فيهم جه هنا وعزمته على كبدة وممبار ممكن يرجّع فى وشك ..

ده وهم يابني صدقني .. الفلامنك زي الإسطنبولي ..

– طب انت عاوز توصل لايه من الآخر عشان أنا تعبت وبدات اشك في نفسي وفي كل حاجه ..

• انا عاوز اقولك خد ربع إسطنبولي .. أصلي ماعنديش فلامنك